ՀՄԱՅՔԻ ԳԱՂՏՆԻՔՆԵՐԸ

Երբ բանաստեղծը նկարագրում է գեղեցիկ կնոջ արտաքինը, ապա անպայման շեշտադրում է վերջինիս աչքերը, ձեռքերը եվ մազերը: Հարուստ, փայլուն, խիտ գանգուրներով ուսերին թափված վարսերը օրինական հպարտությունն են այն կանանց, ովքեր գիտեն, թե ինչպես դրանք խնամել: Իսկ ջանքեր թափել, այո, պահանջվում է, քանի որ ոչ բոլոր կանանց է այդ հարստությունը տրված ի բնե:

Անցավ այն հիանալի ժամանակը, երբ մենք կարող էինք խոտաբույսերի, հյութալի ամառային մրգերի ու պտուղների օգնությամբ հոգ տանել մեր մազերի մասին, սնուցել դրանք, էներգիա հաղորդել, բուժել` դարձնելով փայլուն, ամուր ու գեղեցիկ: Առջեվում խստաշունչ ձմեռն է, եվ մենք պետք է կարողանանք այնպես անել, որ սեզոնափոխությունը մեծ վնասներ չհասցնի մեր կանացի գեղեցկության ամենաէական դետալներից մեկին: Իսկ պայքարել, հավատացեք, հնարավոր է, նույնիսկ եթե դրսում ձմեռ է...

Որպեսզի մազերը լինեն ենթարկվող, փայլեն ու քիչ ճյուղավորվեն

Չոր, ճյուղավորվող մազերի խնամքի համար շատ օգտակար է հետեվյալ միջոցը. 0,5 թեյի գդալ ձկան յուղը եվ 1 թեյի գդալ գերչակի յուղը խառնեք էմալապատ ամանի մեջ ու տաքացրեք` պահելով գոլորշու վրա, ապա մազերը բաժանեք փնջերի ու մատների ծայրերով յուղային զանգվածը քսեք գլխի մաշկին` հետեվելով, որ լավ ներծծվի: Վրայից հագեք պոլիէթիլեն ու գլուխը փաթաթեք տաք գլխաշորով` այդպես թողնելով 15 րոպե: Այդ ընթացքում պատրաստեք հաջորդ խառնուրդը. 1 ձվի սպիտակուցը հարեք կերամիկական ափսեի մեջ, ավելացրեք 1 թեյի գդալ չոր մազերի համար նախատեսված օճառահեղուկ ու կրկին հարեք: Գլխաշորը հանեք ու նախորդ դիմակի վրայից գլխի մաշկին հավասարաչափ քսեք այս մյուս խառնուրդը: Թողեք մոտ 5 րոպե, ապա մազերը թրջեք տաք ջրով ու լվացեք: Վերջում մազերն անպայման ցողեք թթվաշ ջրով. 1 թեյի գդալ կիտրոնի աղ կամ սեղանի քացախ` 1 թաս ջրին:

Շաբաթական գոնե 1 անգամ մազերին կարտոֆիլից դիմակ դրեք: Վերցրեք 2 հատ միջին մեծության կարտոֆիլ, լվացեք, կեղեվը մաքրեք ու անցկացրեք մանր քերիչով:Առանձին ամանում հարեք 1 ձվի դեղնուց, ավելացրեք 1 թեյի գդալ որեվէ բուսական յուղ, 1 թեյի գդալ հեղուկ մեղր, 1 թեյի գդալ մանր աղ: Ստացված զանգվածը լցրեք կարտոֆիլային շիլայի վրա ու լավ խառնեք: Մազերը լվանալուց առաջ դրանք բաժանեք փնջերի ու պատրաստի դիմակը քսեք գլխի մաշկին, իսկ մնացորդը քսեք մազերի ողջ երկայնքով: Գլուխը փաթաթեք տաք գլխաշորով, թողեք 30-40 րոպե, ապա մազերը լվացեք փափուկ օճառահեղուկով ու վերջում կրկին ցողեք կիտրոնի աղով կամ քացախով թթվեցրած ջրով:

Ի դեպ, կարտոֆիլը հիանալի միջոց է մազերի բուժման համար: Այն կարող է տարբեր կերպ ազդել` կախված այն բանից, թե ինչ եք ավելացնում վերջինիս:

• Յուղոտ մազերը կարտոֆիլը դարձնում է սակավ յուղոտ, իսկ չոր մազերը սնուցում ու ամրացնում է:

• Բոլոր տիպի մազերը կարտոֆիլային դիմակներից հետո դառնում են էականորեն ավելի փայլուն ու հարթ:

Յուղոտ մազերի համար օգտակար է կարտոֆիլից ու թթված կաթից պատրաստված դիմակը: Մաքրեք մի քանի կարտոֆիլ ու անցկացրեք դրանք մանր քերիչով: Քամեք 6 ճաշի գդալ կարտոֆիլի հյութ ու լցրեք այն 200 մլ թթված կաթի վրա: Ի դեպ, որքան ավելի յուղոտ են մազերը, այնքան ավելի թթվաշ պետք է լինի կաթը: Ղանգվածը լավ խառնեք, քսեք մազարմատներին, իսկ մնացորդը տարածեք մազերի ողջ երկայնքով: Գլխին հագեք պոլիէթիլեն, ապա փաթաթեք տաք գլխաշորով: Դիմակը թողեք 30 րոպե, ապա լվացեք յուղոտ մազերի համար նախատեսված օճառահեղուկով:

Չոր մազերի համար պատրաստեք կարտոֆիլով, ձվի դեղնուցով ու մեղրով դիմակ: Վերցրեք 3 հատ միջին մեծության կարտոֆիլ, մաքրեք, անցկացրեք մանր քերիչով, քամեք հյութը, ավելացրեք 1 ձվի դեղնուց եվ 20 գր հեղուկ մեղր: Բաղադրիչները լավ խառնեք ու քսեք նախապես լվացված ու դեռեվս փոքր-ինչ խոնավ մազերին` մերսող շարժումներով ներծծելով գլխի մաշկի մեջ: Դիմակը թողեք 30 րոպե, ապա լվացեք տաք ջրով` առանց օճառահեղուկի, եվ չորացրեք առանց վարսահարդարիչ գործածելու:

Գլխամաշկի քորից եվ մազերի ճյուղավորումից ձերբազատվելու համար շաբաթական գոնե 2 անգամ խնձորով դիմակ դրեք մազերին: Այն հիանալի կերպով թարմացնում է գլխի մաշկը: Վերցրեք 1 խոշոր խնձոր, անցկացրեք մանր քերիչով եվ մազերը լվանալուց առաջ ստացված խյուսը քսեք մազերին ու գլխամաշկին: Գլուխը փաթաթեք տաք գլխաշորով ու պահեք 30 րոպե: Վերջում մազերը լվացեք տաք ջրով եվ թողեք, որպեսզի չորանան բնական ճանապարհով:

Որպեսզի մազերը չթափվեն, այլ արագ աճեն

Մազերի ամրացմանն ու դրանց աճի արագացմանը կնպաստի քերած գազարով եվ մուգ թեյով պատրաստված դիմակը: Վերցրեք 1 միջին մեծության հում գազար, մաքրեք ու անցկացրեք մանր քերիչով: Խյուսը տեղափոխեք կերամիկական ափսեի մեջ, ավելացրեք 5 կաթիլ գերչակի յուղ, 1 թեյի գդալ թթվասեր կամ խիտ սերուցք ու մի փոքր մուգ թեյի գույն: Բաղադրիչները լավ խառնեք, մազերը լվանալուց առաջ դրանք բաժանեք փնջերի ու դիմակը քսեք գլխամաշկին` մնացորդը տարածելով մազերի ողջ երկայնքով: Գլխին պոլիէթիլեն հագեք, փաթաթեք բրդյա գլխաշորով, պահեք 40-50 րոպե, ապա մազերը լվացեք օճառահեղուկով ու ցողեք թթվեցրած ջրով:

Ի դեպ, հենց տնային պայմաններում կարող եք գազարով օճառահեղուկ պատրաստել, որի համար հարկավոր է ընդամենը խառնել հետեվյալ բաղադրիչները.

• 1 ձվի դեղնուց,

• 20 գր բուսական յուղ,

• 20 գր կիտրոնի հյութ,

• 4 ճաշի գդալ գազարի հյութ:

Այս ամենը հարկավոր է լավ հարել եվ մազերը լվանալիս գործածել օճառահեղուկի փոխարեն: Արդյունքը հիանալի է:

Թուլացած մազերը հիանալիորեն ամրացնում է հյութերից պատրաստված դիմակը: Վերցրեք 2-ական ճաշի գդալ կաղամբի եվ դեղձի հյութ, խառնեք, ավելացրեք հում ձվի սպիտակուց, 20 գր կոնյակ, 20 գր մեղր: Բութ, լայն ատամներ ունեցող սանրի միջոցով խառնուրդը տարածեք մազերի ողջ երկայնքով, գլխին հագեք պոլիէթիլեն, ապա տաք գլխաշոր կապեք ու պահեք 2 ժամ, որից հետո լվացեք մազերը օճառահեղուկով: Ուժեղ մազաթափության դեպքում այս դիմակը շատ օգտակար է, պարզապես հարկավոր է կիրառել այն պարբերաբար` շաբաթական 1 անգամ 2-3 ամսվա ընթացքում:

Յուղոտ մազեր ունեցողներին խորհուրդ է տրվում պատրաստել եվ օգտագործել հետեվյալ բնական օճառահեղուկը. քիչ քանակությամբ ջրում լուծեք 2 ճաշի գդալ չոր մանանեխ, տաք ջուր ավելացնելով` խառնուրդի ծավալը հասցրեք 1 լիտրի: Ստացված լուծույթը գործածեք օճառահեղուկի փոխարեն:

Թեփի պատճառած անհամար տհաճությունները

Փորձեք թեփի դեմ պայքարել հետեվյալ պարզ, սակայն շատ արդյունավետ միջոցով: 1 կգ բազուկը մաքրեք, շերտերով կտրատեք, դասավորեք 3 լիտրանոց ապակյա տարայի մեջ ու վրան 1,5 լիտր սառը ջուր լցրեք: Մի քանի օր շարունակ տարան թողեք լուսամուտագոգի վրա: Երբ կտեսնեք, որ կանաչ բորբոս է առաջացել, թուրմը քամեք երկշերտ մառլյայով եվ ստացված հեղուկը գործածեք մազերը լվանալուց հետո` ցողելու նպատակով:

Թեփի դեմ հիանալի միջոց կարելի է պատրաստել նաեվ մաղադանոսի սերմերից: Մաղադանոսի սերմերի վրա 1:5 հարաբերակցությամբ բուսական յուղ լցրեք, զանգվածը 30 րոպե տաքացրեք գոլորշու վրա, ապա հովացրեք եվ քամեք: Բալզամը պատրաստ է: Մազերը լվանալուց 2-3 ժամ առաջ այն քսեք գլխամաշկին` չմոռանալով նախապես փոքր-ինչ տաքացնել: Գործընթացն իրականացրեք 1 ամսվա ընթացքում` երկու օրը մեկ հաճախականությամբ: Հարկ եղած դեպքում բուժման կուրսը կարելի է կրկնել մի քանի շաբաթ ընդմիջումից հետո:

Կօգնի ադամաթուզը

Մազերի խնամքի գործում ադամաթուզը լայն կիրառություն ունի: Վերջինիս միջուկն օգտակար է ինչպես չոր, այնպես էլ յուղոտ մազերի համար:

Եթե մազերը չափից ավելի չոր են, սնուցեք դրանք ադամաթուզից դիմակով: Ադամաթզի կեղեվը մաքրեք, միջուկը տեղավորեք էմալապատ տարայի մեջ ու պատառաքաղով տրորեք: Խյուսին ավելացրեք 1 հատ հարած ձվի դեղնուց, 2 ճաշի գդալ թթվասեր, 1 թեյի գդալ մեղր: Բաղադրիչները խառնեք ու մազերը լվանալուց առաջ ստացված զանգվածը քսեք գլխամաշկին ու մազերին: Դիմակը պահեք 40 րոպե` գլուխը տաք փաթաթելով: Վերջում մազերը լվացեք օճառահեղուկով, ապա ցողեք թթվեցրած ջրով: Յուրաքանչյուր անգամ նման դիմակից հետո ձեր մազերը կդառնան ավելի փափուկ ու փայլուն:

Յուղոտ մազերի դեպքում կիրառեք հետեվյալ դիմակը. լավ հասած, խոշոր ադամաթզի կեղեվը մաքրեք, միջուկը տրորեք պատառաքաղով, իսկ կեղեվն անցկացրեք մսաղացով ու խառնեք իրար: Ավելացրեք 2 թեյի գդալ կիտրոնի հյութ ու կրկին խառնեք: Ձեր առջեվ դրեք 2 տարաներ, որոնցից մեկում կլինի ստացված զանգվածը, իսկ մյուսում` թարմ կաթ: Նախ, բամբակի օգնությամբ գլխամաշկին ու մազերին քսեք կաթը, ապա վրայից` ադամաթզով պատրաստված զանգվածը: Գլուխը կապեք տաք գլխաշորով, պահեք 30-40 րոպե, ապա մազերը լվացեք փափուկ օճառահեղուկով: Նման դիմակից հետո ձեր մազերը կդառնան առավել ենթարկվող, փափուկ ու նուրբ:

Կոմպրես յուղոտ մազերի համար

Յուղոտ մազեր ունեցողներին խորհուրդ է տրվում ժամանակ առ ժամանակ կիրառել հետեվյալ կոմպրեսը. 1 ձվի դեղնուցը հարել 2 թեյի գդալ կոնյակի հետ, ստացված խառնուրդը քսել մաքուր մազարմատներին անմիջապես լվանալուց հետո: Գլխին պոլիէթիլեն հագնել, վրայից տաք գլխաշոր փաթաթել ու պահել 10-15 րոպե, որից հետո մազերը լվանալ տաք ջրով:

Մազերի աճի ու ամրացման համար կարեվոր նշանակություն ունի մերսումը

Շաբաթական մեկ անգամ գլխամաշկը մերսեք մատների բարձիկներով: Նման գործընթացը շարժման մեջ է դնում գլխի մաշկը եվ խթանում արյան շրջանառությունը: Մերսումն իրականացնելիս մատներն ամուր սեղմեք գլխամաշկին ու շրջանաձեվ առաջ-հետ շարժումներ կատարեք` առանց այդ ընթացքում մատները տեղաշարժելու: Նմանատիպ շարժումներ կատարեք գլխի մաշկի ամբողջ տարածքով:

Ի դեպ, գլխի մազածածկույթը սնուցող եվ մազերի արագ աճին նպաստող արյան շրջանառության բարելավման համար կարեվոր նշանակություն ունի յոդը: Մասնագետները սահմանել են, որ այս տարրի տեվական անբավարարությունը կարող է հանգեցնել մազերի աճի դադարեցման ու մազաթափության: Այդ պատճառով հետեվեք, որ ձեր սննդակարգում ներառվեն նաեվ յոդով հարուստ ծովամթերքներ:

Առաջարկում ենք փոքրիկ խորամանկություն նրանց համար, ովքեր չեն կարողանում ձերբազատվել անընդհատ սանրվելու սովորությունից: Եթե սանրվելուց հետո զգում եք, որ գլխամաշկը փայտացել է, կատարեք հետեվյալ պարզ վարժությունը. գլուխը թեքեք դեպի առաջ ու մատների բարձիկներով մերսեք գլխամաշկը: Այս հասարակ վարժության միջոցով դուք կնպաստեք արյան շրջանառության ակտիվացմանը, հետեվաբար` նաեվ գլխամաշկի թարմացմանը:

Մազերի հարդարում

Երեվի քչերը գիտեն, որ մազերը կարելի է հարդարել նաեվ բնական միջոցների օգնությամբ` խուսափելով վտանգավոր քիմիայից: Օրինակ, կիտրոնի հյութը (այն կարելի է պատրաստել մեկ բաժակ ջրում կես կիտրոնը քամելով) փափուկ մազերը դարձնում է ենթարկվող ու փայլ է հաղորդում դրանց:

Եվս մի արդյունավետ միջոց. տարեկանի հացը թրջեք եռացրած ջրով, թողեք 2-3 ժամ, ապա քամեք ու ցողեք մազերը` դրանք հարդարելուց առաջ:

Գելի փոխարեն սանրվածքի կայունությունը հիանալի կերպով կպահի վուշի սերմերից պատրաստված թուրմը, հատկապես եթե կարճ մազեր ունեք:

Որպեսզի մազերը չէլեկտրականանան

Այս տհաճ երեվույթից խուսափելու համար հարկավոր է մազերը լվանալուց ու թեթեվակի չորացնելուց հետո դրանց վրա փրփուրի բարակ շերտ քսել, իսկ արդեն լրիվ չորացնելուց հետո` գել: Դրանք հակաստատիկ բաղադրիչներ են պարունակում, որոնք էլ հենց պայքարում են մազերի էլեկտրականացման դեմ:

Եթե այդ նյութերը ձեր ձեռքի տակ չկան, ապա խոնավ մատներով սանրեք մազերը:

Բացի այդ, մազերի էլեկտրականացման դեմ լավ միջոց է փայտե մերսող սանր-խոզանակը: Իսկ ահա պլաստիկե սանրերը, ընդհակառակն, նպաստում են էլեկտրականացմանը:

Փոքրիկ խորհուրդ. որպեսզի մազերը չէլեկտրականանան, սանրվելուց առաջ սանրի ատամներին ցողեք մի քանի կաթիլ վարդի յուղ: Այն ոչ միայն գեղեցիկ փայլ կհաղորդի ձեր մազերին, այլ նաեվ հիանալի բնական հակաստատիկ ազդեցություն կունենա:

Վարժություններ մազերի ամրացման համար

Չինական բժշկությունն առաջարկում է մազերի ամրացմանը նպաստող մի հետաքրքիր ու օգտակար վարժություն: Այն շատ պարզ է ու հեշտ իրագործելի. աջ ձեռքի բթամատը սեղմեք ճկույթի հիմքին, ձախ ձեռքի բթամատը` ցուցամատի հիմքին, ու այդպես մատները պահեք 3-5 րոպե:

Իննա Ինինա

Աղբյուրը` www.passion.ru